Amnistia Legearen eta Pedro Sanchezen aurkako protestak Euskal Herrira ere iritsi dira. Atzo iluntzean protesta bana egin zituzten Iruñean eta Bilbon. Bizkaiko hiriburuan hogei lagun inguru bildu ziren PSE-EEren egoitzaren aurrean. Nafarroakoan, berriz, 50 izan ziren, gazteak horietako asko, eta ikur frankistak ere izan ziren protestaldian. PSNren egoitzaren aurrean bildu ziren, Sarasate pasealekuan.
Vox eskuin muturreko alderdiaren gazte erakundeak deitu zuen Iruñeko protestara. Espainiako bandera ugari izan ziren, eta, horiekin batera, Nafarroakoa eta Borgoinako Gurutzearena. Espainia ez da saltzen leloa zuen pankarta bat zuten, eta «Biba Espainia» eta «Biba erregea» oihukatu zuten. Pedro Sanchez eta Maria Txibiteren kontrako irainak ere oihukatu dituzte, eta «Txibite, ETAren txotxongilo», ere bai.
Amnistia legearen eta Sanchezen aurkako aldarriak ez dira bakarrak izan, ordea, hiri buruzagian. Protesta horretan parte hartu dutenek honelakoak ere oihukatu dituzte, besteak beste: «Espainia kristaua, ez musulmana», «potroak baldin badituzu, hauteskundeetara deitu», «bozka zaitzala Txapotek» eta «Espainiako prentsa, manipulatzailea» ere oihukatu dute.
Madrilen beste protesta egun bat izan zen atzokoa. 4.400 pertsona inguru bildu ziren Ferraz kalean, PSOEren egoitzaren aurrean. Aurreko egunean bildu zen kopuruaren erdia da, baina tentsioa agerikoa izan zen. Eskuin muturreko ultrek suziriak eta petardoak bota zizkioten Poliziari, eta polizia bat eta La Sexta telebista kateko kamerari bat zauritu zituzten. Pertsona bat atxilotu zuten.