Iruñeko Udaltzaingoak lau gizonezko atxilotu zituen atzo, egotzita emazteki bati sexu erasoa egin izana ortziralean, Karpa Unibertsitarioa festaren testuinguruan. Atzo jakinarazi zuten, eta gaur bertan elkarretaratzea egin dute NUP Nafarroako Unibertsitate Publikoan. «Unibertsitateko Karpa jaialdian, lau gizonek emakume bat bortxatu zuten, taldean. Irmoki salatzen dugu gertakaria, eta gure babes eta elkartasun osoa adierazi nahi diogu eraso dioten emakumeari», adierazi dute. Itaia emakumeen antolakunde sozialistak eta Saretu NUPeko emakume taldeak egin dute deialdia.
Agerraldian erran dutenez, emakumeak dira «gizartetik baztertuak eta estigmatizatuak» indarkeria matxistako kasuetan: «Gu gara kalean seinalatuak garenak eta errudun sentiarazten gaituztenak, gu gara babes neurriekin itota eta intimitaterik gabe bizi behar dugunak».
Hain zuzen, Leire Olariaga Itaiako kideak adierazi du ortziraleko sexu erasoa «kasu bakan bat izatetik urrun, indarkeria matxistaren beste adibide gordin bat» dela. Halaber, erran du ideia erreakzionarioen gorakada dela-eta matxismoa «normalizatzen» ari dela, «indarkeria matxista ukatzeraino»: «Ideologia ultraeskuindarrak, alde batetik, indarkeria matxista ukatzen du, eta mahai gainean jartzen ditu emakumeen eskubideen aurkako posizioak. Eta, bestetik, indarkeria matxista erabiltzen du mezu arrazistak eta klasistak zabaltzeko eta sustatzeko».
Horren aurka posizionatzera, antolatzera eta erasoei erantzun irmoak ematera deitu du.
Garazi Miguel mintzatu da Saretu taldearen izenean, eta gogoratu du taldekoek kanpaina bat abiarazi zutela Unibertsitate Karparen jai eredua salatzeko. «Horren harira, NUPek ez ikusi egitea erabaki zuen. Are, iaz informazio puntu bat jartzeko eskaera egin genuen, eta ukatu zuten», borobildu du.
Iruñeko Udalak ere «erabateko arbuioa» azaldu du erasoari dagokionez, eta «babesa eta elkartasuna» adierazi emakumeari eta haren gertukoei: «Emakumeentzako hiri librea nahi dugu, eta berdintasunaren alde jarraituko dugu lanean, emakumeen kontrako indarkeria amaitzeko biderik behinena delakoan». Bihar eguerdian elkarretaratze isila egingo dute. Nafarroako Gobernuak, berriz, «gaitzespen irmoa» agertu du.
Lau atxilotu
Emaztekiak salaketa jarri zuen, eta atzo lau gizon atxilotu zituzten, sexu erasoa egitea leporatuta. Ortziraleko 22:00 aldera jazo zen erasoa, Amaia Kirol Hiritik gertu —han zegoen ezarria karpa—, Media Luna parkean. Zenbait hedabidek argitaratu dutenez, emakumea konortea erdi galduta aurkitu zuen lagun talde batek. Foruzaingoa eta udaltzainak bertaratu ziren, eta anbulantzian eraman zuten ospitalera. Era berean, sexu erasoei aurre egiteko protokoloa abiatu zuten.
Azaldu dutenez, DNA probak egiteko agindu du poliziak, eta emaitzen zain daude.
