Ernai gazte antolakundeak Isuskitza mendiko (Araba) gurutze frankista eraitsi du gaur goizaldean, eta aldarrikatu «ikur frankistek eta faxismoak» ez dutela lekurik Euskal Herrian.
1936ko gerran borroka eremu bihurtu ziren Isuskitzako belardi eta larreak, eta 1940an hildako indar faxisten omenez hamasei gurutze frankista eta monolito bat jarri zituzten bertan, Arabako Foru Aldundiaren eta hainbat udaletxeren babesarekin.
Ernairen arabera, «zapalkuntzarik gabeko» Euskal Herri baten alde egiteko, ezinbestekoa da halako «ikur faxisten» kontra borrokatzea. Hala, ikur horiek kentzeko exijitu diete instituzioei, eta Donostian hilaren 13an Euskal Herria irabaztera! Faxismoari ez! dinamikaren barruan antolatutako mobilizazio nazionalera batzeko deia egin dute.
