Gizon batek «azken hilabeteetan» Gasteizko taberna bateko komunetan hainbat emakumeren irudiak grabatu dituela salatu du Itaiak. Antolakundearen ustez, ez da kasu bakana. «Gero eta gehiago ari gara ikusten emakumeen irudi intimoak hartu eta, askotan, talde zein foroetan partekatzen dituzten kasuak», deitoratu du Itaiak hedabideei helarazitako ohar batean. Egoera salatzeko eta «erasotzaileen inpunitateari» erantzuteko, agerraldia antolatu dute Arabako hiriburuan, asteazkeneko 18:30ean, Zeledonen balkoian.
Taldearen ustez, horrelako egoerak «ez dira onargarriak», eta «erantzun sozial zabal eta irmoak» behar dira erasoei aurre egiteko. Horregatik, asteazkeneko agerraldira bertaratzeko deia egin diete herritarrei, bertan «eraso matxista forma berri hauen aurkako mezu irmoa» zabaltzeko.
