Jaizkibelek konpainia gisa desfilatuko du datorren irailaren 8ko alardean, bigarren urtez jarraian. Hondarribiko Udalak (Gipuzkoa) horretarako baimena eman dio aurten ere, Igor Enparan alkateak iragarri duenez. «Udal Gobernu honek beti errespetatuko ditu hondarribiar guztien eskubideak, eta Hondarribia justua izateko berdintasunean bizi behar dugu. Inor ezin da inoren gainetik jarri», adierazi du.
Gaur eman du erabakiaren berri Enparanek. Erran duenez, udalak dekretu bakarra onartuko du kale erabileraren antolaketa zehazteko: «Ez da lan erraza izan, baina gure ardura da guztia behar bezala ateratzea». Herritar guztiei eskatu diete udalaren erabakia «errespetuz» hartzeko: «Jaiak bizitzeko eta gozatzeko dira, baina ekitaldi guztietan ezinbestekoa da elkarrenganako errespetua».
Iaz jaso zuen Jaizkibel konpainiak udalaren errekonozimendua lehenbizikoz: ordura arte manifestazio baten moduan atera behar izan zuten konpainiakoek, eskatuta ere udalak ez zielako konpainia gisa desfilatzeko baimenik ematen.
2023an hartu zuen kargua Enparanek (Abotsanitz alderdikoa), ordura arte agintean egon ziren jeltzaleei alkatetzaren lekukoa hartuta. Eta orduan hasi zen gobernu berri horren «konponbiderako bidea»: izan ere, jeltzaleek bizkarra eman izan diote hautu parekideari, inoiz gutxi izan dute hartu-emanik Jaizkibelekin, harrerarik ez zioten egiten; eta alarde baztertzaileari, berriz, maiz erakutsi izan diote atxikimendua.
Enparanek, ordea, sustatu zituen bai alarde baztertzaileari eta bai Jaizkibel konpainiari harrera egiteko orduan eginiko berritasunak. Hain justu ere, duela bi urte erran zuen pozgarria zela alderdi guztiak egon izana «harrera instituzionalaren gunean» —Hondarribiko EAJk ez zion harrerarik egin Jaizkibeli; eta Hondarribiko EH Bilduk, Emakundek eta Arartekoak ez zioten harrerarik egin hautu baztertzaileari—; gogoratu zuen hori gertatzen zen lehen aldia zela aldarri parekidea hasi eta horren ondorioz gatazka hasi zenetik. Argi zuen keinua ezinbertzekoa zela: «Herritar guztiek merezi dute harrera egitea». Alde horretatik, «maila instituzionalean urratsak» egin zirela azpimarratu zuen.
