Atzo hil zen Jean Marie Berckmans Merkataritza eta Industria Ganberako (MIG) lehendakari ohi eta enpresaburua. 86 urte zituen. Enpresaburu izan baino lehen, Aire-sur-l’Adourreko (Okzitania) seminarioan ibili zen. Baionako lizeo teknikora joan zen ondotik, eta kontularitza formakuntza segitu zuen kontularitza enpresa bateko buru izan aitzin.
Berckmans partikularki ezaguna zen, 1980ko hamarkadan Renault auto kontzesionarioa izan baitzuen Miarritzen (Lapurdi). Enpresa sortu eta berehala, GPME Enpresa Ttipi eta Ertainen Patronatuaren Konfederazio Orokorreko lehendakari izendatu zuten. Fitesko, 1986an, Merkataritza eta Industria Ganberako (MIG) lehendakariorde izan zen, eta, ondotik, 1995ean lehendakari kargua hartu zuen 2011 bitarte.
MIGetik erretiratu zelarik, Baionako portuan egin inbertsioa azpimarratu zion Sud Ouest egunkariari. «Ni etorri nintzelarik, portuaren jarduera jaisten ari zen bi urte guziz, eta, ondorioz, 120 milioi euro inbertitu genituen galerak saihesteko». Bertzalde, Bidarteko (Lapurdi) ingeniaritza eskolaren sortzea nabarmendu zuen, baita Izarbel teknopoloaren garapena ere. «108 enpresa erakarri ditugu Izarbelera, eta horrekin batera 800 ingeniari eta 1.400 lanpostu sortu», erran zuen orduan.
Baionako Herriko Etxeko Urrezko Domina emateaz gain, Ohorezko Legioko Zaldun izendatu zuten Berckmans. Ehorzketa asteazkenean eginen dute, 14:30ean, Angeluko (Lapurdi) San Leon elizan.
