Etxerat elkarteak jakinarazi duenez, Jose Javier Oses euskal presoa lekualdatu dute, Fleury Merogisko espetxetik Mont de Marsangora. Euskal Herritik 760 kilometrora zegoen Oses, eta, orain, 234 kilometrora dago.
EPPK Euskal Preso Politikoen Kolektiboak eskatua du presoak kartzela horretara lekualdatzeko, eta baita Etxerat elkarteak ere, baina horietako kasik guztietan ezezkoa eman die gobernuak presoei, baita Auzitegi Administratiboak abokatuen bitartez jarritako helegiteei ere.
Hala ere, izan dira onartutako lekualdaketak ere. Arkaitz Saez eta Aratz Gomez lapurtarrak ekainaren 29an Mont de Marsanera transferitu zituzten —biak urrian askatu zituzten—, baina, Maritxu Paulus Basurko abokatuak BERRIAri abuztuan adierazi zionez, horiek ez ziren izan Zuhaitz Errastiren kasua bezain argiak. Errasti abuztuan gerturatu zuten, eta Oses izan da laugarrena.
2012an atxilotu zuten Oses, eta zortzi urteko zigorra betetzen ari da.
