Josetxo Ibazetaren kontrako salaketa jarri du Fiskaltzak

Josetxo Ibazeta epaitzea eta zigortzea nahi du Espainiako Auzitegi Nazionaleko Fiskaltzak, eta, horretarako, haren kontrako salaketa jarri du, «terrorismoa goratzea» eta «mehatxuak egitea» egotzita. Ana Noe fiskalak aurkeztu duen idatzian jartzen du Ibazeta «mehatxu tonuan» gerturatu zela Espainiako selekzioaren garaipena ospatuz Espainiako banderarekin Donostiako Parte Zaharrean zebiltzan zale batzuengana, «Gora ETA militarra» esan ziela eta «pistola atera eta bi tiro emango dizkizuet» gaineratu zuela. Gertaera horiengatik Ibazetari deklarazioa hartzeko eskatu du Noe fiskalak, eta liskarrean ziren gainerako pertsonak identifikatzeko.

Juan Karlos Izagirre Donostiako alkatearen idazkaria zen Ibazeta hori gertatu zenean. Prentsan irudiak agertu ostean, dimisioa eman zuen, eta alkateak onartu egin zuen. Ibazetak esandakoak «erabat onartezinak» direla esan zuen Izagirrek.