Nafarroako Udal eta Kontzeju Federazioak zuzendaritza berritu du gaur, Iruñeko hotel batean egin duten batzar orokorrean. Batzarrak Juan Carlos Castillo independentea aukeratu du Nafarroako Udal eta Kontzejuen Federazioko presidente. Azkoiengo alkateak bigarren bozketan lortu du lehendakari izendatua izateko babesa.
Lehen bozketan, Mario Fabo Martzillako alkatea (Navarra Suma) izan da bozkatuena. 490 boto jaso ditu. Castillok 356 boto jaso ditu, eta 376 Ander Orozek (EH Bildu). Azken horrek, ordea, etena eskatu du bigarren bozketaren aurretik, eta Castillo babesteko eskatu du, bere hautagaitza erretiratu ez duen arren. Ondorioz, Castillo nagusitu zaio Fabori, 690 borotekin. 492 jaso ditu Fabok, eta boto bat Orozek.
Enrique Maia Iruñeko alkateak hitza hartu du batzarra amaitu aurretik, eta eskatu du aktan jaso dadila Orozek beste hautagai batentzako babesa eskatu duela bere hautagaitza erretiratu gabe. Hori araudiaren kontrakoa izan daitekeela adierazi du Maiak.
