Galiziako hauteskundeetarako egin zuten koalizioarekin jarraituz, apirilaren 21eko Eusko Legebiltzarreko hauteskundeetarako ere akordioa lortu dute Elkarrekin Podemosek eta Aliantza Berdeek. Elkarrekin Podemos-Aliantza Berdea izenpean, Juan Lopez de Uralde izango da Arabako zerrendaburua.
Pilar Garrido eta Lopez de Uralde Elkarrekin Podemoseko eta Aliantza Berdeak taldeko buruzagiek gaur goizean iragarri dute koalizioa, Gasteizen. Lopez Uralde lau aldiz izan da Podemosen eta Unidas Podemosen Arabako zerrendaburua, lehen hirurak Equon eta laugarrena independente gisa, eta lauretan eserlekua lortu zuen.
Erabaki positiboa izan da bi alderdien koalizioa Lopez de Uralderentzat: «Koherentzia, leialtasuna eta aurretik inork egin ez dituen gauzak egiten saiatuko gara». Garridorentzat ere, akordioa «oso albiste ona» izan da. Lopez de Uralderekin batera, David Soto izango da Gipuzkoako zerrendaburua, eta Miren Gorrotxategi lehendakarigaia eta Bizkaiko zerrendaburua.
Hauteskunde batzordeei koalizioen osaketa jakinarazteko epearen bezperan iragarri dute Elkarrekin Podemos-Aliantza Berdea koalizioa.
