Josep Gonzalez-Cambray Kataluniako Generalitateko Hezkuntza kontseilariak Tknika bisitatu du gaur goizean, Jokin Bildarratz Eusko Jaurlaritzako Hezkuntza sailburuarekin batera. «Euskadiko Lanbide Heziketaren Ikerketa Aplikatuko Zentroa» Errenterian (Gipuzkoa) dago, eta bertara joan dira Gonzalez-Cambray eta haren taldea.
Zentroaren arlo estrategietako batzuk eta horietako bakoitzean garatzen ari diren proiektuak ezagutu dituzte. Aurkeztu diete, besteak beste, eredu horrek zer harreman duen inguruko enpresekin, berrikuntza eta ikerketa aplikatuko zer proiektu garatzen ari diren, onarpen prozesua eta Lanbide Heziketa Dualaren eredua.
Tknikara egindako bisitaren ostean, bilera egin dute. Eta bertan hartu dute parte, sailburuez gain, beste hainbat politikarik, Eusko Jaurlaritzaren eta Kataluniako Generalitatearen izenean. Egunotan, Kataluniako hezkuntzaren arduradunak Arabara, Bizkaira eta Gipuzkoara biltzen ari dira, hainbat gai estrategikori buruz dituzten ikuspegiak eta analisiak trukatzeko asmoz Jaurlaritzako Hezkuntza sailarekin.
Tknika zentroa
Tknikak ikerketa eta berrikuntza aplikatua ditu ardatz. Eta gerora Lanbide Heziketako euskal ikastetxeetara eramango diren proiektu estrategikoak sortzen dituzte. Hala nola sistema adimendunak, nazioartekotzea eta jasangarritasuna lantzen dituzte. Zentroan, Zibersegurtasuneko gelak, espazio interaktibo digitalak eta Robotika Autonomoko tailerra dituzte.
