Guillermo Vallejoren bide beretik hitz egin du gaur goizean Francisco Jose Ansorena ingeniari eta Belateko tunelen kontratazio mahaiko kideak. Nafarroako Parlamentuko ikerketa batzordean, adierazi du Jesus Polo kontratazio mahaiko buruaren jardunbidea ohikoa dela, eta lizitazio gehienetan «horrela jokatzen» dela: «Ohikoena da presidenteak gainerako kideen balorazioak jasotzea eta azken txostena hark lantzea». Ansorenak berretsi du azken txosten hori begi onez ikusi zutela beste lau ingeniariek eta «aho batez» babestu zutela. «Denoi iruditu zitzaigun nahikoa argudiatua eta azaldua zegoela. Ulertzen genuen teknikoki ongi egina zegoela».
Ikusi gehiago
Ustelkeriaren hipotesia desegiten ari zaiola jakinik, UPNko Marta Alvarezek iritzi politikoekin nahastu du Ansorenari egindako galdeketa. UPNk ez du etsi, baina. Alvarezen esanetan, agerian geratu da Jesus Polo gai izan zela ingenierien bozketa manipulatzeko, eta horretarako baliagarri zaizkio Lorenzo Serena idazkari judizialak bozketaren metodologia horren inguruan plazaratutako zalantzak. Ansorenak ez du iritzirik eman uste horiei buruz, baina argi utzi dio ingeniariak ezin direla hipotesietan oinarritu. «Ez dago horren froga irmorik. Nik ezin dut esan nork esaten duen egia, Polok edo Serenak. Ez dagokit niri esatea nork egin duen gaizki. Ez da nire lana».
Ekainean, Serenak metodologia hori auzitan jarri zuen, eta, 2023ko ekainaren 21ean egindako bilera batean, Polo kendu eta beste bozketa bat egitea proposatu zuen. Eta notarik onenak eta apalenak kentzea proposatu zuen. Alvarezek galdetu du zergatik ez zuten aintzat hartu gomendio hori. «Ez dakit hari jaramon egitea hobeagoa izango ote zen. Hari kasu egin eta jaramon egin izan bagenio, agian leporatu ziezaguketen Polo gainetik kendu eta beste eragile baten alde jokatzen ari ginela. Orduantxe egoki iruditu zitzaiguna egin genuen, eta gertaeretan oinarritu ginen, ez hipotesietan».
«Orduantxe egoki iruditu zitzaiguna egin genuen, eta gertaeretan oinarritu ginen, ez hipotesietan»
FRANCISCO JOSE ANSORENA Kontratazio mahaiko kidea
Beste auzi garrantzitsu bat da ingeniariek hartutako erabakiaren azalpen teknikoa. 2023ko maiatzaren 11tik 26ra bitartean, Polok kontratazio mahaiko bost kideen balorazio teknikoak jaso zituen, eta, maiatzaren 30ean, guztiek egindako azterketaren bilduma idatzi zuen. «Oso lan zaila da, izugarria. Bost pertsona gara, eta guztiona dokumentu bakarrean bildu behar da, eta, gainera, zazpi enpresa izanik, are zailago da. Oso gai irekiak dira, eta azalpenak zabalak dira. Ez da test moduko azterketa bat».
Ansorenaren arabera, egindako azalpen txostena baliagarria zen, baina, legelariek hala eskatuta, lau aldiz hobetu zuten. «Sekulako esfortzua egin genuen mahaiko kide guztiak —legelariak, barne— ados jartzeko. Ikusirik ez zela posible, aurrera jo genuen. Nahiko ongi azalduta dago, eta, inork azalpenak eskatuz gero, argi genuen hori egiteko gai izango ginela».
Ansorenak, baina, Polorekin izandako solasaldi polemiko bat azaldu du, baina ez zuen gogoan noiz izan zen. Haren esanetan, Polok aipatu zion Mariezkurrena eraikuntza enpresarekin batera zihoan beste partaide bat ezagutzen zuela, eta lanean «esperientzia txarra» izan zuela haiekin. UPNko parlamentariak galdetu dio ea bere botoa baldintzatzen ahalegindu ote zen: «Ez dakit zer asmo zuen. Bere iritzia zela esan, eta hor moztu nuen elkarrizketa», aipatu du Ansorenak, eta argi utzi du horrek ez zuela baldintzatu bere balorazioa: «Guk ez dugu ikaslearen balorazioa egiten, azterketarena baizik. Enpresen eskaintzak dioen horretara mugatu behar da, eta berdin dio zure bihotzak zer esaten dizun».
Zurrumurru giroaz
Ansorenak azaldu du Lurralde Kohesioko departamentuan «ohikoak» direla zurrumurruak, eta, Belateko tunelaren aurrekontua handia izanik, are gehiago. «Indar handiagoz entzuten zen. Gure lanaren parte dira txutxu-mutxuak, eta nik ez diet jaramonik egiten». Ansorenak aipatu du askotan zurrumurruek diotena ez datorrela bat lizitazioarekin, baina oraingo honetan Acciona atera zen irabazle. «Halabeharrez izan da». Argi utzi du ez duela inongo esku hartze politikorik edo presiorik jasan.
PSNko Javier Lekunberrik gogoeta bat egin du ikerketa batzordearen nondik norakoaz. «Hemen dugun arazoa zera da, politikoki norbaitek gobernua eraistea erabaki duela eta gaizki ateratzen ari zaiola. Obra honetan ustelkeria egon dela erakutsi behar dute, eta horretarako derrigorrez behar dute azaldu kontratazio mahaiko kideek erabaki partzialak hartu zituztela, eragin politikoen pean. Horretarako, mahaiko zortzi kideak jomugan jarri dituzte».
