LAB sindikatuak helegite berezi bat aurkeztu du Eusko Jaurlaritzako Osasun Sailak oinarrizko bizi euskarriaren eta garraio programatu eta hitzartuaren anbulantzia zerbitzuak esleitzeko onartutako pleguen aurka. Osasun Sailak uztail hasieran egin zuen deialdia anbulantzietako zerbitzu horiek kontratatzeko pleguak lizitatzeko. Kontratuak lau urte iraungo du, eta beste hiru urtez luzatu ahal izango da. Jaurlaritzaren arabera, lizitazioaren balioa 650 milioi euro ingurukoa da lau urterako; LABek, berriz, nabarmendu du 1.200 milioi eurotik gorako kostua izango duela luzapen posibleak kontuan hartuz gero.
Jaurlaritzaren asmoa da zerbitzua enpresa pribatuen bidez ematen jarraitzea, gaur egun indarrean dagoen eredu publiko-pribatuaren kudeaketari eutsita. Lizitazioaren aurka agertu dira, besteak beste, LAB eta sektoreko langileen ordezkaritza zabal bat; haien ustez, aukera bat galtzen ari da zerbitzua Osakidetzaren egituran integratzeko eta zuzenean kudeatzeko.
LABen ustez, lau urteko iraupena eta hiru urteko luzapena aurreikusten dituen lizitazioak osasun garraioaren pribatizazioaren aldeko apustua sendotzen du, eta Osakidetzaren kudeaketa publikoa indartzeko aukera baztertzen. Sindikatuak ohar batean azaldu duenez, pleguak inpugnatzeko aurkeztutako errekurtsoak Osasun Sailaren eredua bera jartzen du auzitan. Sindikatuaren iritziz, Alberto Martinez sailburuaren departamentuak ez dio jarraitu Osasun Itunak zerbitzu hori publifikatzeko jasotzen zuen jarraibideari, eta entzungor egin die gizarteak osasun sistema publikoaren alde egindako eskaerei.
Zerbitzu publikoen «merkantilizazioa»
Sindikatuak salatu du EAJk eta PSE-EEk sustatutako politikek «funtsezko zerbitzu publikoen merkantilizazioa» bultzatzen dutela. Horren ondorioz, haren esanetan, baliabide publikoak enpresa pribatuen esku uzten dira, Osakidetzaren egitura indartu beharrean. LABen arabera, «makrokontratuaren» zenbatekoak erakusten du Jaurlaritzak lehentasuna ematen diola kanpo kudeaketari, osasun garraioa zuzenean kudeatzeko aukeraren kaltetan.
Bestalde, sindikatuak gogorarazi du azken urteotan anbulantzia zerbitzua kudeatu duten enpresek hainbat irregulartasun izan dituztela lan arloan: besteak beste, salatu du soldatak berandu ordaindu izan dituztela eta pleguetan ezarritako betebeharrak urratu dituztela, eta administrazioak ez duela behar bezalako neurririk hartu.
Horrez gain, nabarmendu du beste autonomia erkidego batzuetan osasun garraioaren kudeaketa publikoa berreskuratzeko egindako esperientziek emaitza onak eman dituztela, bai kostuen eraginkortasunean, bai lan baldintzen hobekuntzan eta bai herritarrei eskaintzen zaien arretaren kalitatean.
Horiek horrela, iragarri du bide judizialari eutsiko diola eta datorren ikasturterako mobilizazioak prestatzen ari dela. Era berean, herritarrei dei egin die osasun sistema publikoaren alde eta anbulantzia zerbitzuaren publifikazioaren alde antolatuko diren protestetan parte har dezaten.
