Lantaronen (Araba) eraiki nahi duten eguzki energia proiektuko hirugarren parke fotovoltaikoari oniritzia eman dio gaur Eusko Jaurlaritzak. Ingurumen inpaktu txostena aldekoa da, baina zenbait zuzenketa egin beharko dituzte. Jaurlaritzak igorritako txostenaren arabera, instalazio horrek «garrantzi urriko» kalteak eragingo ditu ingurugiroan. Halere, enpresak zenbait zuzenketa egin beharko ditu inpaktua murrizteko. Txostenean diotenez, neurri horiek hartuz gero, ingurumenean ez du sortuko «eragin kaltegarri esanguratsurik».
Guztira, 35.500 eguzki plaka edukiko ditu FV Comunion enpresak Lantarongo Komunioi auzoan egin nahi duen proiektu fotovoltaikoak. Gaur oniritzia jaso duen parkeak ia 4.400 eguzki plaka edukiko dituela aurreikusten da. Proiektua osatzen duten lau parkeetatik txikiena da gaur onartutakoa. Gainerako hirurek 10.400 panel izatea aurreikusten da, eta, jada, horietatik bik jasoa dute oniritzia joan den ekainean. Hiru parke handien horietako bakoitzak 4,995 megawatteko potentzia instalatua izango du, eta gaur onartutakoak, 2,1 megawattekoa.
