Iruñeko Udaltzaingoak lau gizonezko atxilotu ditu aurreko ostiralean, Karpa Unibertsitarioa festaren testuinguruan, emakume baten kontrako «intentsitate handiko sexu eraso bati» lotuta. Emakumeak salaketa bat jarri zuen, eta lau lagunak gaur atxilotu dituzte.
Ostiraleko 22:00ak aldera jazo zen erasoa, Amaia Kirol Hiritik gertu —han zegoen ezarrita karpa—, Ilargierdiaren parkean. Zenbait hedabidek argitaratu dutenez, emakumea konortea erdi galduta aurkitu zuen lagun talde batek. Foruzaingoa eta udaltzainak bertaratu ziren, eta anbulantzian eraman zuten ospitalera. Era berean, sexu erasoei aurre egiteko protokoloa abiatu zuten.
Azaldu dutenez, poliziak DNA probak agindu ditu, eta emaitzen zain daude. Epaileak bihar erabakiko du atxilotutako lau lagunen egoeraren inguruan.
