G7koen goi bileraren garaian, Baionan atera zituzten eragile ekologistek lapurtutako 128 potretak, Emmanuel Macron Frantziako presidentearen engaiamendurik eza salatzeko klima larrialdiarekiko. Urte osoan Bizi, Alternatiba eta ANV COP21 mugimenduek aitzina eramandako kanpainaren emaitza izan zen.
Hain zuzen ere, Bizi mugimenduko zazpi kide atxilotu zituzten, joan den maiatzaren 28an. Aurretik, apirilaren 9an, bost kide Baionako polizia etxera deitu zituzten deklaratzera. Taldean eginiko lapurreta leporatu zieten.
Gaur, zortzi aktibista ekologistaren eta kazetari baten auziaz arduratzen ari dira Parisen, delitu bera egotzita. Bost urteko kartzela zigorra eta 75.000 euroko isuna ukan dezakete. Aldi berean, Macron presidentearen 130 potret kendu dute hainbat aktibistak Saint-Ouengo (Ile-De-France) Herriko Etxetik, "akusatuei elkartasuna helarazteko eta gobernuaren klima politika salatzeko".
