Espainiako Osasun Publikoaren Batzordeak erabaki du tximino baztangaren aurkako txertoaren dosi txikiagoa emango dietela oro har herritarrei. EMA Sendagaien Europako Agentziaren irizpideari jarraituz hartu dute erabakia, hark joan den ostiralean baimendu baitzuen dosi txikiagoa eman ahal izatea. Haurdun dauden emakumeak, immunoeskasia duten pertsonak eta umeak dira salbuespena: egungo dosi bera jarriko diete horiei.
Orain arte, 0,5 mililitroko dosia ematen zieten herritarrei; aurrerantzean, berriz, 0,1 mililitrokoa izango da. Egin dituzten kalkuluen arabera, orain arteko dosiak halako lau jarri ahal izango dituzte horrela. Berez, bi dosi jarri behar zizkieten, batetik bestera 28 eguneko tartea utzita. Alabaina, txerto gutxiegi egon direnez, bakarra jartzen zieten. Carolina Darias Espainiako Gobernuko Osasun ministroak ostiralean jakinarazi zuenez, estrategia berriarekin bi dosiak ipiniko dituzte.
