Araba, Bizkai, Gipuzkoa eta Nafarroako sendagileen sindikatuek bat egin dute medikuen kolektiboa biltzen duten Espainiako sindikatuen greba deialdiarekin. Medikuentzako estatutu marko propio bat lortzea da grebaren helburua. Espainiako Osasun Ministerioarekin negoziatzen aritu dira, medikuen eskakizunak kontuan hartzen dituen estatutu bat lortu nahian, baina, sindikatuek jakinarazi dutenez, alde bien jarrerak oso urrun daude oraindik.
Euskadiko Sendagileen Sindikatuak (SME) estatutu berri horrek jaso beharko lituzkeen eskakizunak azaldu ditu, besteak beste, pausoak ematea derrigorrezko lanaldi osagarria kentzeko —35 orduko lanalditik kanpo lan egindako denbora borondatezkoa izan dadin—. Guardiei dagokienez, 17 orduz jarraian lan egiteko muga eskatu dute, eta, erretiroarekin lotuta, aldez aurretik erretiratzeko aukera izatea erosahalmena galdu gabe.
Biharko kontzentrazioak antolatu dituzte Hego Euskal Herriko lau hiriburuetan. Zenbait ospitaletan eta osasun zentrotan egingo dituzte: Txagorritxun (Gasteiz), Gurutzetan (Barakaldo, Bizkaia) eta Donostia ospitaletan 11:00etan, eta hiriburu bakoitzeko beste osasun zentro batean 12:00etan —Olagibelen (Gasteiz), Areilzan (Bilbo) eta Amara Berrin (Donostia)—. Nafarroan, Vianako Printzea espezialitate zentroan deitu dute elkarretaratzera, 08:00etan.
