EAJk eta ERCk Espainiako gobernabidea ahalbidetu dute, Idoia Mendiaren esanetan, eta, hori «positibotzat» hartu du PSE-EEko idazkari nagusiak gaur goizean Gasteizen egindako agerraldi batean: «Horixe zen sozialistok nazionalistei eskatzen geniena, Espainiako gobernabidean inplika zitezela eta akordioarekin busti zitezela».
Haren hitzetan, «pertsona eta lurraldeen arteko adiskidetasuna» da PSOEren «identitate marka», eta, Espainiako egoera berriari esker, «lurralde gaiei buruzko eztabaidak gainditu egingo ditu ikuspegi plural eta tolerantea» izango duen gobernu horrek. Haren ustez, «Espainia eta Euskadi ez dira lurralde uniformeak, pluralak baizik», eta hori ontzat jo du. Nabarmendu duenez, sozialistek Eusko Jaurlaritzan egindako lanak modua eman du «herritarrentzako garrantzitsuak» diren gaietan arreta jartzeko.
