Larrialdi zerbitzuek 64 urteko gizonezko baten gorpua aurkitu dute Hondarribian (Gipuzkoa), Jaizkibel menditik gertu. Eusko Jaurlaritzako Segurtasun Sailak jakinarazi duenez, mendizalea oso goitik erori da itsasertzean.
Azaldu dutenez, 13:00ak aldera, Sos Deien larrialdietako zentroak dei bat jaso du, mendi inguruan ibilbide bat egiten ari zen pertsona bat oso goitik erori dela esanez. Ertzaintza, suhiltzaileak eta osasun zerbitzuak bertaratu dira, eta helikoptero batek aurkitu du hura, sarbide zaileko eremu batean. Hondarribiko heliportura eraman dute, baina, han, mendizalearen heriotza baieztatu besterik ezin izan dute egin.
Ertzaintzak ikerketa bat jarri du martxan, heriotzaren arrazoiak argitzeko.
