Migratzaileentzako «harrera duina» eskatu dute Irunen

IRUN. Beatriz Artolazabal Berdintasun, Justizia eta Gizarte Politiketarako sailburuak herenegun eman zuen Eusko Jaurlaritzaren Uda 2021 planaren berri, eta iragarri zuen 500 toki prestatuko dituela Bidasoa eskualdean (Gipuzkoa), Lapurdirako muga pasatu nahi duten migratzaileentzat. Irungo Harrera Sarearen ustez, planak «irizpide diskriminatzaileak» aplikatzen ditu, pertsonak «desberdintzen eta sailkatzen» dituelakoan. «Aterpetxetik kanpo geldituko dira pertsona batzuk, eta horrek haien zaurgarritasuna areagotuko du», ohartarazi du kolektiboak ohar baten bidez.

Migratzaileak hartuko dituzten guneen zerrendari dagokionez, sareak esan du badaudela frontoiak eta gimnasioak baino «baliabide egokiagoak» bidean diren migratzaileei laguntzeko: «Aterpetxeak daudenean, ez dirudi bidezkoa horrelako baliabideak martxan ipintzeak». Era berean, migrazioa «Europako lege arrazistek» baldintzatzen dutela esan du. «Ikusi dugu politika horrek zer dakarren. Bi pertsona hil dira ».