Euskal Herriko Mugimendu Feministak mobilizatzeko deia egin du gaurko Palestinaren alde, eta, zehazki, emakume palestinarrak jasaten ari diren genozidioa salatzeko. Atzo arratsaldean egindako mobilizazioei segida emango diete gaur eguerdian eta arratsaldean Euskal Herriko hainbat txokotan. Mugimendu feministak Palestinaren aldeko aldarri feministak egitera deitu ditu herritarrak, atzo eta gaur etengabe egon dadin emakume palestinarren aldeko agerraldiren bat. Hain justu, atzo Hego Euskal Herriko lau hiriburuetan antolatu zituzten ekinaldiak.
Euskal Herriko Mugimendu Feministako kideek jakinarazi dute emakume palestinarrekin harremanetan direla, eta gaur-gaurkoz Euskal Herrian lau ardura dauzkatela: «Emakume palestinarrak jasaten ari diren genozidioa salatzea, Palestinaren aldeko ekinaldi eta mobilizazio feministak antolatzea, erakundeei eta gobernuei presio egitea Israelera armak bidaltzeari uzteko, eta, azkenik, Israelen aldeko enpresa eta erakunde guztiei boikot egitea».
Mugimendu feministako kideen esanetan, genozidioa «kolonialismoaren eta harreman kolonialen isla argia da», eta, beraz, Israelen aurka eta Palestinaren alde lerratzea «askatasunaren» alde egitea ere bada, «sistema kapitalista zisheteropatriarkal arrazista eta kolonialistaren aurka, hain zuzen ere».
Gogoratu dutenez, Euskal Herriak urteak daramatza Palestinari elkartasuna eta babesa adierazteko mobilizazioak antolatzen eta Israelgo «estatu sionistaren» aurkako boikotean aktiboki parte hartzeko dei egiten; nazioarteko boikot kanpainak, desinbertsio kanpainak… «Mugimendu feministako kideoi ere horietan parte hartzea dagokigu, eta bide honetan jarraitzeko dei egiten dugu. Euskal Herriko enpresa, erakunde eta instituzioek apur ditzatela Israelekin dituzten harremanak, orain!», azaldu dute.
