Astelehenean hasiko dira Gasteizko jaiak, eta GKS Gazte Koordinakunde Sozialista eta Etxebizitza Sindikatua «kezkatuta» daude txosnetan zer gertatuko ote den. Mugimendu Sozialistako bi eragileek ohar bat igorri dute komunikabideetara, esanez Poliziak aurreko astean egindako kanpaldiaren aurka «bortizki» oldartu ondotik eta horren ostean hainbat buruzagi politikok egindako adierazpenei erreparatuta «jopuntuan» ikusten dituztela euren txosna eta jaietarako antolatutako egitaraua.
Aurten ere, Gasteizko Txosna Batzordeak txosnetatik kanpo utzi ditu Mugimendu Sozialistako bi eragileak. Hala ere, eta baimenik izan ez arren, txosna jarriko dute EHUko Letren Fakultatean, aurreko urteetan egin bezala. Salatu dutenez, udalak ez die baimenik ematen txosna muntatzeko, EAJk «errepresioa» erabiltzen du haien aurka, eta txosna muntatzeagatik «mehatxu» egiten diete. Egoera «korapilatsua» ikusirik, irtenbide bat bilatzeko bilera bat eskatu zioten joan den astean txosna batzordeari, baina hark biltzeari uko egin diola salatu dute. «Ondorioz, babesgabe aurkitzen gara, eta Poliziaren esku hartze posible baten menpe gaude», adierazi dute.
Egoera ikusita, GKS eta Etxebizitza Sindikatua «kezkatuta» daude jaietan zer gertatuko ote den. Berretsi dute «betoa» salatzeko txosna jarriko dutela, eta espero dutela inolako liskarrik ez egotea. Txosnetan parte hartzeko eskubidea dutela aldarrikatu dute atzera ere, eta haien aldarrikapenak babesten dituzten gasteiztarrei dei egin diete euren egitarauan parte har dezaten. Era berean, astelehenean txosna muntatzen parte hartzera animatu dituzte herritarrak, 11:00etan, EHUko Letren fakultatearen aurrean.
