Manuel Resa Valtierrako (Nafarroa) alkateak migratzaile adingabeei buruz egindako «gorroto adierazpenak» kritikatu ditu Ana Ollo Nafarroako Gobernuko lehendakariordeak. Errandakoak «onartezinak» direla adierazi du Ollok, eta migratzaile adingabeen gaineko gorrotoa sustatzen dutela. Halaber, horren inguruan Nafarroako Gobernuak nola jokatuko duen galdetuta, adierazi du aztertzen ari direla zer «lege ekintza» hartu ahal diren.
Cadena Ser irratian egin ditu adierazpenak Resak, erranez migratzailek «dirutza handia kostatzen» direla: «5.000 euro hilabeteko». Halaber, erran du migratzaile adingabeek «eskubide guztiak» dituztela, baina «betebehar bakar bat ere ez».
Diru laguntzak
Ez da lehenbiziko aldia Valtierrako alkateak migratzaileen kontrako jarrera erakusten duena. Hain zuzen, jaiotzei lotutako diru laguntza batzuk jarri zituzten indarrean, eta horiek lortzeko baldintzetako batek hautsak harrotu zituen. Izan ere, diru laguntzak lortzeko, bertzeak bertze, gutxienez gurasoetako batek hogei urtez herrian erroldatuta egon behar du. Hori ikusita, Nafarroako Gobernuak laguntza horiei buruzko txosten bat eskatu zion Nafarroako Kontseiluari, baldintzak atzerritarrendako diskriminatzaileak izaten ahal zirela argudiatuta.
Bada, txosten horren arabera, laguntza horiek «zalantza larriak» erakusten dituzte «ordenamendu juridikora egokitzerako orduan». Halere, alkateak adierazi du horiekin aurrera egiteko asmoa duela.
