Osakidetzako langileen baldintzak negoziatzea eta hobetzea helburu duen plataforma bat aurkeztu du gaur ELA sindikatuak. Ohar bidez jakinarazi duenez, Osakidetzako 1.500 langile baino gehiagoren artean egindako galdeketa batean oinarrituta eratu dute plataforma, eta 11 puntuko «akordio iraultzaile bat» erdiestea du xede. Izan ere, ELAk salatu du azken hamabost urteetan ez direla berritu osasungintzako langileen lan baldintzak, eta horiek lantzeko negoziazio mahaia blokeatuta dagoela.
ELAren proposamenak 11 puntu jasotzen ditu: besteak beste, 2022 eta 2026 bitartean galdutako erosahalmena berreskuratzea eta horri %2ko igoera bat gehitzea; asteko lanaldi arrunta 32 ordura mugatzea; eta behin-behinekotasun tasa %8ra murriztea lehiaketa publiko bidezko hautaketa prozesuen bitartez. Hain justu, sindikatuaren arabera, gaur egun iraupen luzeko 19.326 aldi baterako langile daude —lantalde osoaren %43—; iraupen laburreko aldi baterako kontratuak dituzten 3.000 langile inguru, eta bete gabeko 2.014 lanpostu. Horrez gain, ELAren proposamenak barne hartzen du langileak euskalduntzeko behar diren baliabideak ezartzeko presio egitea.
ELAk Ertzaintzan eta hezkuntzan lortutako akordioak jarri ditu adibidetzat, eta nabarmendu du sektore horietan izandako hobekuntzak «mobilizazioei esker» izan direla; halere, adierazi du ezinbestekoa dela «borondate politikoa» egotea.
