Iruñeko Txantrea auzoko Patxi Ruiz Romero euskal presoak ebakiak egin dizkio bere buruari, besoan zehazki, osasun arretarik eza salatzeko. Tinko erakundeak adierazi duenez, Ruizek egunak daramatza pneumonia sintoma gogorrekin: eztula du, sukarra, biriketako mina arnasa hartzean, gonbitoka aritu da, eta abar. Horren ondorioz, jan ezinik eta ziegatik atera gabe eman ditu azken hiru egunak, baina oraindik ez du izan medikuaren bisitarik. Hori ikusita, bere buruari ebakiak egitea erabaki du, protesta gisa eta osasun arta egokia eskatzeko. Iruñeko espetxean dago Ruiz.
Iruñerriko Kontseilu Sozialistak elkarretaratzea egin du gaur arratsaldean, Ruizen egoera salatzeko eta elkartasuna adierazteko.
