Jaizkibel konpainia parekideak Plazara Dantzara kolektiboari eman dio aurtengo Hondarribia Berdintasun Hiria saria (Gipuzkoa), Itxas Etxean eginiko ekitaldian. Baztango (Nafarroa) taldea da Plazara Dantzara, eta, sariketaren arduradunek nabarmendu dutenez, aurtengo saria eman diote dantza herrikoietan «emakumeen parte hartzea bermatzeko eginiko borroka» aitortzeko. Maite Asensio Lozano BERRIAko kazetariak jarri die zapia saridunei. Sari banaketaren ostean, Esanezin abeslariak emanaldia egin du.
«Bidasoak lotzen ditu Baztan eta Hondarribia, eta, azken urteetan, jaietan emakumeen parte hartzearen aldeko aldarrikapenak ere lotzen gaitu: hemen alardean, eta han mutil dantzetan», adierazi zuen Jaizkibelek, aurtengo irabazlea nor izanen zen iragarri zuenean.
Aurten 30 urte beteko dira Irungo eta Hondarribiko alardeen gatazka piztu zenetik, eta emakumeek oraindik ezin dute normaltasunez desfilatu: Irunen bi alarde egiten dituzte ekainaren 30ean, haietako batek ez dituelako andrazkoak soldadu gisa onartzen, eta Hondarribian alardetik aparte desfilatzen du Jaizkibel konpainia mistoak.
Hain justu, Jaizkibelek antolatzen du urtero Hondarribia Berdintasun Hiria saria, eta antzeko borroka bati begiratu dio aurtengoan: «Baztango mutil dantzetan emakumeen dantzatzeko nahia eztabaida iturria izan da. Ez da bidea erraza izan, botere eta genero harremanek ere berdin-berdin funtzionatzen dute Baztanen eta Hondarribian. Baina, ibilbide gatazkatsua izan arren, emakumeak lortzen ari dira jaietan plazan dantzan aritzea».
