Plazara!-k «salbuespen legeak» bertan behera uzteko eskatu du

Eskubide zibil eta politikoen aldeko Plazara! mugimenduak «salbuespen legeak» bertan behera uzteko eskatu zuen atzo, Gasteizko Foru plazan egindako ekitaldian. Mugimenduko kideek hirian eskubide zibil eta politikoen behatokia sortzea ere proposatu zuten.

Dozenaka lagunek bat egin zuten atzo Plazara! mugimenduak egindako deialdiarekin, eta aulki bat eskuan, Foru plazan eseri eta hainbat gairen inguruko eztabaida publikoa egin zuten. Udalaren baimena ez zuten ekitaldia egiteko, baina, hala ere, herritarrak batzarrean parte hartzera deitu zituzten aste honetan bertan. Arazorik gabe egin ahal izan zuten atzoko ekitaldia, azkenean.

Kalea eta gune publikoaren erabilera aldarrikatu nahi du Plazara! mugimenduak, sustatzaileek atzo azaldu zutenez. Kalea «protesta, aldarrikapen eta eztabaidarako gune gisa» berreskuratu nahi dute, erakundeen murrizketari eta eskubideen zapalketari aurre eginez. Gainera, oinarrizko eskubide eta askatasunen urraketak pairatzen dituzten herritarrei elkartasuna eta babesa adierazi eta antolatzeko taldea sortu nahi dutela jakinarazi dute.

Eskubideen zapalketa horien ikerketa eta epaiketa ere egin nahi du Plazara! mugimenduak. Hartarako, estatuari herri epaiketa egitea proposatu du.