Hona hemen, aurrerapen gisa, Jean Noel Etxeberri Txetx-en esan batzuk:
- "Luhusokoaz geroztik ez dugu epailearen aitzinean deklaratu, nahiz eta galdegin dugun. Oraindik ez gaituzte deitu".
- "Armagabetze bat izan gabe egon zitekeen bukatu gabeko irudipen bat. Luhusokotik aitzina, desarmatzea teknikoki gauzatzea posible izan zen, atxiloketarik eta tentsio une gehiagorik gabe. Gainera, ekintza kolektibo bat izan zen".
- "[Euskal presoen auzia] Denboraren presioa dago, eta irudipena duzu gauzak ez doazela behar duten abiaduran, baina, aldi berean, kontuan hartu behar da hamarkadetan Parisek espetxe politika jakin bat ukan duela, urrunketan eta sakabanaketan oinarritutakoa, Madril segitu duela itsu-itsuan, eta hori aldatzen hasi dela, lehen aldiz".
- "Aldebiko esparru bat dagoela da prozesuaren balioa. Asteotako hurbilketak ez dira ohikoak, lan baten emaitza baizik".
- "Prozesuak kolektiboak eta egiturazkoak dira, baina lurralde txiki batean pertsonek ere eragin garrantzitsua dute. [Jean Rene] Etxegarai lehendakariaren engaiamenduak balio sinboliko handia ere badu; horrek herritarren mentalitatean Euskal Herria eraikitzen du".
