Arabako Suhiltzaileen Batzordeak zerbitzuaren egoera prekarioa salatu du. Batzordeak ELA sindikatuaren bitartez zabaldu duen idatziaren arabera, oinarrizko prestakuntzarik gabeko suhiltzaileak hasi dira lanean, eta langile faltan daude suhiltzaile parkeetan. Segurtasunaren aldetik «zentzugabekeria» dela esan du, eta arriskutsua dela suhiltzaileentzat eta herritarrentzat.
Batzordeak jakinarazi duenez, astelehenean oinarrizko prestakuntzarik ez duen suhiltzaile bat hasi zen lanean. Ez da bakarra izango. Izan ere, batzordearen arabera, zuzendaritzak esan die jada ez dagoela Arkautiko akademian jasotzen den oinarrizko prestakuntza ikastaroa duen suhiltzailerik. Ondorioz, hemendik aurrera oinarrizko prestakuntzarik gabekoak kontratatuko dituzte. Prestakuntzan, suteetan, trafiko istripuetan eta abarretan lan egiteko oinarrizko ezagutzak irakasten dira.
Ez da lehen aldia, ordea, prestakuntza falta dela. «Urtebete bada Arabako Suhiltzaileen Erakunde Autonomoak ez diela prestakuntza ematen lan poltsetako kideei», esan du batzordeak. Azken oposizioa jarri du adibidetzat: «Hiru urte pasatu dira suhiltzaileek oposizioa gainditu zutenetik, baina lan poltsa ez da osatu, eta ez zaie eman dagokien prestakuntza».
«Pentsaezina»
Are gehiago, salatu dute Arabako suhiltzaile parkeren bat gutxienekoa izan gabe egoten dela hiru egunetik batean. Adibide bat eman dute: joan den astelehenean, hiru suhiltzaile zeuden Espejoko parkean, eta haietako batek ez zuen suhiltzaile prestakuntzarik.
Batzordearentzat «pentsaezina» da prestakuntzarik gabeko langileak kontratatzea: «EAEko beste ezein zerbitzuk ez luke egingo. Arriskutsua da guztiontzat: prestakuntzarik ez duenarentzat, haien nagusientzat, lankideentzat, herritarrentzat, baina baita egoera horren arduradunentzat ere». Horregatik, «berriro ez gertatzeko» eskatu dute.
Suhiltzaileen Batzordeak begi onez ikusi zuen Iñaki Gurtubai Arabako Berdintasun, Euskara eta Gobernantzako diputatu izendatzea. Aitor Uriarte Arabako Foru Aldundiko Suhiltzaileen zuzendari berria denetik aldaketa «garrantzitsuak» izan direla onartu du.
Gurtubai iritsi eta gutxira, EAJk eta EH Bilduk akordioa lortu zuten 2025eko aurrekontuetarako, eta konpromisoa hartu zuten bi ekitalditan suhiltzaile plantilla zabaltzeko. Batzordea baikor azaldu da, baina esan du «ikusteko» dagoela zer egingo duten.
