Prostituzioaren abolizioa helburu izango duen lege proposamen bat aurkeztuko du PSOEk Espainiako Kongresuan. Egitasmo horren berri eman du Pedro Sanchez Espainiako presidente eta alderdi sozialistako idazkari nagusiak gaur Bilbon, PSE-EEren kanpainaurreko ekitaldi batean, Emakumeen Nazioarteko Eguneko mobilizazioen ondorenean.
Sanchezen esanetan, proposamena «gutxi barru» erregistratuko du haren alderdiaren talde parlamentarioak. Espainiako presidenteak gogorarazi du Espainiako Gobernuak pertsonen salerosketaren kontrako lege erreforma bat onartu zuela atzo, Ministroen Kontseiluan. Emakumeen Nazioarteko Egunari begirako keinu «garrantzitsu bat» izan zen, Sanchezen iritziz. Baina adierazi du berak baduela beste konpromiso bat hartua alderdi sozialistaren kongresuarekin, oraindik bete gabe duena: prostituzioaren abolizioa. Hura gauzatzeko borondatea berretsi du gaurko ekitaldian.
Prostituzioarekin lotuta, PSOEko feministen taldeak kanpaina bat jarri zuen abian atzo. Alderdiko kode etikoa erreformatzeko babesa biltzen hasi ziren. Militante feministen taldearen proposamena da kargudun sozialistak PSOEtik kanporatuak izatea baldin eta harreman sexualak eskatzen edo onartzen badituzte diru truke edo bestelako onura baten truke. Alderdiaren kode etikoak «posizio abolizionistarekin koherentea» izan behar duela aldarrikatu dute. Taldeak espero du alderdiko Berdintasun idazkari federal eta Espainiako Berdintasun ministro Ana Redondok eskari horrekin bat egitea.
