Quirogak bertan behera utzi du ETAren biktimak gogoratzeko ekitaldia

Arantza Quiroga Eusko Legebiltzarreko jarduneko presidenteak bertan behera utzi du ETAren biktimak gogoratzeko biharko deitu zuen ekitaldia. PP ez beste alderdien kritikak jaso ondoren hartu du erabakia. Quirogaren jarrera salatu dute alderdi horiek, ekitaldi hori eurekin adostu ez zuelako edo beste biktima batzuk kontuan hartu ez zituelako. Aurreikusitako ekitaldien ordez, larunbatean, Legebiltzarraren atarian biktimen omenez dagoen eskulturan lore sorta bat utziko dute eta su ontzi bat piztuko dute.

Iaz ere polemika sortu zen alderdi politikoen artean. Orduan, PSE-EE, PP eta UPDk euren aldetik egin zuten lore eskaintza, eta gainerako alderdiek, beste bat. Quirogak ohar bidez jakinarazi duenez, Memoriaren Eguna deiturikoa «terrorismoaren biktimei» omenaldia egiteko eguna da, eta, horregatik, antolatu zuen ekitaldia. «Hainbat alderdi politiko ekitaldiarekin bat ez daudenez», aurreikusitako lore eskaintza bertan behera gelditu dela jakinarazi die Diputazio Iraunkorreko kideei eta ETAren biktimen elkarteko ordezkariei.