Larunbatean ekitaldi bat egingo du Etxerat-ek, sakabanaketaren ondorioz hildako hamasei lagunak omentzeko. Gernikan elkartuko dira sakabanaketaren biktimen eta euskal preso eta iheslarien senideak, baita eragile politikoak, sozialak eta sindikalak ere. «Ekimen horren bidez, sakabanaketak eragindako hamasei biktimen aitortza lortzea eta salbuespenezko politika honi amaiera emateko premia aldarrikatzea dugu helburu», esan du Etxerat-ek. «Bakea eta elkarbizitza» lortzeko, biktima horiek aitortzea ere beharrekoa dela diote. «Indarrean dagoen salbuespenezko espetxe politika senideentzat kondena bat da, eta ezinbestekoa da egoera hau amaitzea», gaineratu dute.
Urtzi Errazkinek eta Patricia Peralesek egin dute aurkezpena, Bilbon. Aurreratu dutenez, hitzek eta musikak protagonismo handia izango dute Gernikako Lizeo aretoan izango den ekitaldian. Dagoeneko beteta dagoenez, gonbidapena beharko da sartzeko.
