EHU Euskal Herriko Unibertsitatea gutxiegi finantzatuta dagoela salatzea eta baliabide gehiago eskatzea. Bi helburu horiek hartuta, ordubeteko lanuztea egin dute gaur Leioako campusean, LAB, Steilas, ELA eta CGT-LKN sindikatuek deituta. Protestek ez dute etenik izango asteon: bihar, Donostiako campusean egingo dituzte lanuzteak eta protestak; etzi, Gasteizko campusean; eta ostegunean, Eusko Jaurlaritzaren Bilboko ordezkaritzaren aurrean.
Sindikatuen arabera, 2026ko aurrekontuak ixtear dauden honetan, «ezinbestekoa» da nabarmentzea EHUk baliabide gutxiegi jasotzen dituela; finantzaketa beharrak asetzetik «oso urrun» daudela diote: «Azaroaren 20an EHUko klaustroak unibertsitate publikoaren azpifinantzaketa salatu zuen, eta nabarmen igotzeko eskatu zion Eusko Jaurlaritzari». Sindikatuen esanetan, «unibertsitate publikoarekiko utzikeria interesatua» dago, eta horrek ez du modurik ematen EHUk dituen gabezia endemikoei aurre egiteko.
Xehe azaldu dute egoera. Sindikatuen esanetan, irakasle ikertzaileen kasuan, 2008tik %24,3ko galera izan dute, KPIren igoera dela eta. Salatu dute «prekaritate egoera lazgarriak» bizi dituztela. Bereziki aipatu dute ordezkoak jardunaldi osoan kontratatzeko aukera zabaldu dutela orain, baina jardunaldi partzialean dihardutenek 400-800 euro kobratzen dituztela oraindik orain eta ez dizkietela egindako zenbait lan aitortzen. Horrek ondorioak dituela diote: «Horrek guztiak ez du lanbide hau erakargarria egiten, eta gero eta irakasle lanpostu gehiago geratzen dira hutsik».
Tekazel Teknikariak eta Kudeaketako eta Administrazio eta Zerbitzuetako Langileei dagokienez, erosahalmenean azken hamabost urteetan %18,2ko galera izan dutela diote. Gainera, haien esanetan, zerbitzu edota unitate askok langile gehiago behar dituztenez, gero eta zailagoa da ordezkapenak betetzea. «Garrantzitsua da kolektibo honi ere soldata eta lan baldintza duinak bermatzea».
Eskea errektoretzari
Horregatik guztiagatik, EHUrako «beharrezkoa den finantzaketa» lortzeko jarrera irmoa eskatu diote EHUko errektoretza taldeari: «EHUko zuzendaritzaren ardura da jendartearen zerbitzura dagoen unibertsitate publikoaren beharrei erantzuten dien finantzaketa kemenez defendatzea Eusko Jaurlaritzaren aurrean».
