Hilero bezala, euskal sindikatuek –ELAk, LABek, UGTk, Steilasek, ESK-k, CNTk, CGTk, EHNEk, Hiruk eta Etxaldek– elkarretaratzea egin dute Espainiako Gobernuak Bilbon duen ordezkaritzaren aurrean, Konponbide garaia da. Orain presoak lelodun pankarta baten atzean, Urtebete daramate hileroko agerraldi horiekin –2019ko urtarrilean hasi ziren–. Elkarretaratzean, LABeko ordezkari Cristina Alvarezek ontzat jo du Eusko Jaurlaritzako Bake eta Bizikidetza idazkari Jonan Fernandezek egindako proposamena, euskal presoak zazpi espetxetara hurbiltzekoa.
Nolanahi ere, Alvarezek gogorarazi du Fernandezena «proposamen bat» dela, eta ez «benetako ekintza bat», eta, gainera, ez dela «oso berria». «Gure eskaerak bere horretan jarraitzen du», zehaztu du.
Alvarezek esan duenez, sindikatuen eskaera nagusiak dira presoak Euskal Herriko kartzeletara hurbiltzea, gaixo handi direnak aske uztea, eta presoek gradua aldatzeko aukerari bide ematea.
