Gaur dira epailearen aurretik igarotzekoak Ertzaintzak atxiloturiko hiru gizonak, Bilboko Solokoetxe auzoan izandako hilketarekin zerikusirik dutelakoan. Igande goizean izan zen liskarra, eta han 21 urteko gazte bat sastakatu zuten. Larrialdi zerbitzuek Gurutzetako ospitalera eraman zuten, eta han hil egin zen, bihotzean zituen zaurien ondorioz.
Ertzaintzak ikerketa abiarazi zuen, eta hurrengo egunetan hiru gizon atxilotu zituen: 31 urteko gizon bat Bilbon, 21 urteko bat Getxon (Bizkaia), eta 28 urteko beste bat, Bilbon hori ere. Azken horrek bere burua entregatu zuen Ertzaintzaren Deustuko polizia etxean, abokatu batek lagunduta. Ertzaintzak uste du Getxon atxiloturikoa sastakadaren egilea dela, eta beste biek hura babestu zutela edo liskarrean parte hartu zutela, baina orain epaileak erabaki beharko du haien kontrako neurririk hartzen ote duen.
Eusko Jaurlaritzako Segurtasun Sailak jakinarazi zuenez, 06:45 zirela jaso zuten abisua igandean, eskatuz Polizia bertaratu zedila Fika kalera, Santutxuren eta Zazpikaleen artean. Borroka bat izan zela eta lagun bat zaurituta zegoela zioen abisuak. Zauritua ziplo erori zen, eta borrokan ari ziren gainontzekoek korrika egin zuten ihes. Prentsan agerturiko zenbait informazioren arabera, liskarrean aritutako taldeek ez zuten lehenagotik elkar ezagutzen, eta elkarrekin topo egin zutenean sortu zen borroka.
