Aurtengo irailaren 27an 51 urte beteko dira erregimen frankistak Juan Paredes Txiki eta Angel Otaegi ETAko militanteak erail zituenetik, eta Sortuk egun hori baliatuko du zenbait ekitaldi antolatzeko. Euskal Herriko 50 herritan baino gehiagotan bilduko dira egun hura oroitzeko, Loturak askatzera! lelopean.
Alderdiak adierazi du irailaren 27a oroimenerako eguna izango dela. Txiki eta Otaegiren fusilamenduen urteurrena hainbat kide eta belaunaldi elkartzen dituen eguna da Sorturentzat: «Euskal Herriaren eta haren askatasunaren alde borroka egin zutenak eta ari direnak batzen gaitu irailaren 27ak».
Baina, aldi berean, etorkizunera begiratzeko garaia ere badela adierazi du. Euskal Herriaren «askapen prozesua une erabakigarri batean» dagoela deritzo Sortuk, eta uste dute aukera dagoela «78ko erregimenean lotuta gelditu ziren korapiloak» askatzeko: «Euskal Herrian potentzial politiko izugarria daukan fase politiko bat zabaltzea lortu dugu. Eta, orain, askapen prozesuan egoera berrietan murgiltzeko baldintzak ereitea dagokigu».
Aurtengo irailaren 27ko ekitaldietan erakutsiko duten kartela Mikel Erkiaga bilbotarrak egin du. Zatikatutako memoriaren teknika oinarri hartu duela azaldu dute, eta argazki, paisaia eta elementu sinbolikoak uztartuz osatu duela.
Ekitaldiak egingo dituzten udalerriak:
- Araba. Gasteiz, Agurain eta Amurrio.
- Bizkaia. Bilbo, Algorta, Areatza, Arrigorriaga, Bakio, Barakaldo, Basauri, Berango, Bermeo, Busturia, Durango, Enkarterri, Itzubaltzeta, Larrabetzu, Lekeitio, Leioa, Markina-Xemein, Mutriku, Ondarroa, Otxandio, Portugalete, Santurtzi, Sestao, Sopela, Ugao eta Zornotza.
- Gipuzkoa. Donostia, Azpeitia, Bergara, Eibar, Errenteria, Getaria, Hernani, Lezo, Oiartzun, Tolosa, Urretxu, Usurbil, Zarautz eta Zumarraga.
- Ipar Euskal Herria. Hendaia.
- Nafarroa. Iruñea, Baztan, Bera, Leitza, Lizarra, Etxarri Aranatz eta Tafalla.
