SOS Arrazakeria Gipuzkoako Izan Harrera programak Gipuzkoan bizi proiektua garatzen ari diren pertsona migratzaileen, errefuxiatuen eta nazioarteko babesa eskatzen duten pertsonen eta boluntarioen arteko bidelaguntza harremana sustatzen du. Parte hartzaileak aldizka elkartzen dira egunerokotasuneko momentuak partekatzeko: kafe bat hartzeko, herria ezagutzeko edo hizkuntza praktikatzeko, besteak beste. Aurten hasiko den zazpigarren ediziorako mentore berriak bilatzeko dei egin du SOS Arrazakeria Gipuzkoak, jada mentoretza sozialeko prozesu bati ekiteko zain dauden pertsonei akonpainatzeko.
Kanpaina honen bitartez, mentoretza soziala hurbildu nahi die Gipuzkoan bizi diren eta gizarte inklusiboago baten eraikuntzan parte hartu nahi duten adin guztietako pertsonei. Kanpaina zabaltzeko jada parte hartu duten pertsonen lekukotasunak bildu dituzte. «Mundua beste modu batean ikusteko» laguntzen duen esperientzia dela diote mentore moduan aritu diren pertsonek. Lagunduak izan direnak ere adierazi dute «lagunduak eta babestuak» sentitzeak gizarteratze prozesuan asko lagundu dietela.
Izan Harrera programak Eusko Jaurlaritzaren, Gipuzkoako Foru Aldundiaren eta Donostiako Udalaren babesa du. Azaldu dute programa honen helburua ez dela laguntza ematea edo arazo zehatzak konpontzea; migratzaileen, errefuxiatuen eta nazioarteko babesa eskatzen duten pertsonen gizarteratzea eta ongizate psikosoziala sustatuko dituzten harremanak eta loturak sortu nahi dituzte boluntarioen laguntzaren eta akonpainamentuaren bitartez.
Elkarteak azpimarratu du ez dela beharrezkoa ezagutza espezializaturik edo aurretiazko esperientzarik izatea mentore izateko: «Nahikoa da denbora pixka bat izatea, konpromisoa eta beste pertsona bat gertutasunetik ezagutzeko gogoa». Hala ere, boluntarioek hasierako prestakuntza, laguntza eta jarraipena jasoko dituztela azaldu dute.
