Mauleko Chaumes gasnategiko langile ohi bat epaituko dute uztailaren 3an: bost emaztek salaketak jarriak dituzte haren kontra, sexu jazarpenagatik. Zuberoako Feministek bultzaturik, sostengu sare zabala osatua izan da, eta sostengu gaualdia antolatu dute etziko.
Gasnategiko langilea izateaz gain, CGTko ordezkari sindikala ere bazen gizona. Jazarpen kasuen berria inguruetara zabaldu zelarik, erasotzaileak «sostengu zabala» jaso zuela diote Zuberoako Feministek. Halere, barne mailako ikerketa egin, eta Chaumes gasnategitik kanporatu zuten. Iratiko etxoletan lan egin zuen gero: handik ere «joatea galdegin zitzaion», militanteek azaldu dutenez, berriz ere sexu jazarpenaren eta erasoengatik. Bigarren kasu horri dagokionez, ordea, salaketarik ez da izan, «afera arrunt isilarazia» delakoan.
Sostengu taldeak zabaldutako agirian, azaldu dute antolatutako gaualdiak bi helburu nagusi dituela: biktimak sinesten dituztela argi uztea, eta haiek «ekonomikoki doi bat laguntzea». Kasua ezagutarazteko asmoa dutela ere adierazi dute, eta gehitu: «Hitza hartzea ez da sinple. Sexu jazarpen eta erasoen kasuan oraino gaitzago. Erakutsiko dugu sinesten eta sostengatzen ditugula». Hitzordua Ozazen (Zuberoa) emana dute ostegunerako antolatu duten kabaret gaualdian. «Jatekoa, edatekoa, zirkua, kantorea, dantza... eta elkartasuna» bilduko ditu jaialdiak.
