Ke zuri batek hartu ditu gaur goizean Pasaiako portuko inguruak. Portuko agintaritzak prentsa ohar baten bidez jakinarazi du sute bat piztu dela txatar tontor batean, eta hura itzaltzeko ahaleginetan ari direla. Suhiltzaileak, SOS Deiak eta Pasaiako portuko atoiontziak lankidetzan ari dira.
Bitartean, inguruko bizilagunentzako neurriak hartu dituzte ertzainek; Pasai Donibanera heltzeko errepidea ixteko agindua eman dute, eta trafikoa Jaizkibeletik bideratzen ari dira udaltzainak. Bidegorria ere moztuta dago. Pasaiako Udalak ohar bat atera du. Zabaltzen ari den kea arriskutsua dela esan du: «Suhiltzaileen arabera, suteak sortzen duen keak edo lurrunak osagai toxikoak izan ditzake».
Inguruko bizilagunei begira ere abisua: «Leihoak ez irekitzeko eta sutearen inguruko kaleetara ez ateratzeko» gomendioa eman diete. Keak, batez ere, Lezo ingurura egin du, eta bertako bizilagunek telefono bidezko alerta bat jaso dute abisuarekin.
