«Auzolanean euskara sustraitik espaziora». Lelo horrekin abiatu da gaur Errigoraren Euskarari puzka udazkeneko kanpaina. Tafallako Kultur Zentroan eman diote hasiera egitasmoari: «Ager eremutik», Errigorako kide Adriana Urmeneta Castillok esan duenez. Euskal Herri osoko euskaldunei zuzendu zaizkie, iluntasunaren erdian mezu baikor bat helarazteko: «Etorkizun hurbilean argia ikustea ere kosta egiten zaigun garai hauetan, ameslarion bandora batzeko gonbidapena egin nahi dizuegu». Harekin batera, gaurko aurkezpen ekitaldian izan dira AEKko Tutera eta Zangozako euskaltegietako ikasle eta irakasleak; Lizarra, Zangoza, Tafalla eta Tuterako ikastoletako ikasle eta irakasleak; Euskal Herriko eta Nafarroako Ikastolen Elkarteko ordezkariak; Tafallako D ereduko institutuko ikasle eta irakasleak; Sortzen elkarteko kideak; Errigorako ekoizleak; Euskarabidea; eta zenbait mankomunitate eta partzuergoko euskara agenteak eta teknikariak.
Ikusi gehiago
Agerraldian azaldu dutenez, hiru saski mota jarri dituzte eskuragai, urtero bezala: beltza, berdea eta gorria. Nahi duen orok eskaera egin dezake Errigora.eus atarian edo euskaltegietan, D ereduko ikastetxe eta ikastoletan, eta beste hainbat tokitan zabaldu dituzten eskuorrien bitartez. Azaroaren 12ra bitarte egin daiteke eskaera. Saski beltzak 60 euro balio du, eta Nafarroa hegoaldeko produktu tipikoak ditu. Saski berdea bost euro garestiagoa da, eta produktu ekologikoz osaturik dago. Eta, azkenik, saski gorriak 75 euroko prezioa du, eta Eguberrietan oparitzeko aproposak diren produktuak biltzen ditu, hala nola ardi gazta, polboroiak eta patxarana. Urtero «16.000 saski inguru» saltzen dituzte, eta horien gibelean «24 kontserbagile» eta «seiehun nekazari inguru» daude, eta saskien bidez jasotako dirua euskara sustatzeko proiektuetan inbertitzen du elkarteak.
Aitzindariak Ager eremuan
Izan ere, Errigorakoen ustez, euskarak belaunaldiz belaunaldi aurrera egin badu, «zegoenarekin konformatu ez eta konbentzimendua ez zen beste bermerik gabe pausoak eman zituzten horiengatik egin du aurrera». Lan horren adibidetzat jo dituzte Nafarroako hegoaldean zabaldutako ikastolak, euskaltegiak, D ereduko lerroak eta euskara taldeak. «Euskalgintzako eragileek urte luzez egin dute lan espiritu horrekin».
Halako proiektuek aurrera egiteko, baina, ezinbestekotzat jo dute gizartearen babesa. «Euskarak, den-dena behar izateaz gainera, den-dena merezi baitu. Hortaz, inkonformismoaren eta amets egitearen apologia egitera gatoz gaur, euskara Nafarroa erdialdean eta hegoaldean sustrai sendoekin lurrera lotu dadin, eta, hortik, izarretarainoko elkartasuna ehuntzeko». Urmenetaren esanetan, Euskarari Puzka kanpaina tresna bat da euskarari babesa emateko: «Auzolanari lotzen gatzaizkio urtero-urtero, herri honen lurraldeen arteko josturak indartzeko eta gure hizkuntza, herri honen hizkuntza, zaintzeko. Eskatu Ager eremuko lur goxoak emandako produktuz beteriko saskiak, eta lagundu euskara errotu eta izarretaraino eramaten».
