Epaileek euskara eskakizunen aurka egin dute berriro ere. Oraingoan, Donostiako Administrazioarekiko Auzien 1. epaitegiak bazter utzi du Donostiako Udaleko «mugikortasun agenteak» egonkortzeko lan deialdiko eskakizunetako bat: langileek euskarazko B2 maila izatea, lanpostu guztietarako —bederatzi lanpostu dira—. Agente horiek hiriko trafikoa bideratzeaz-eta arduratzen dira.
EFE berri agentziak eman du sententziaren berri. Haren arabera, behin-behineko funtzionario batek jarri zion helegitea bederatzi lanpostuko egonkortze prozesuari; B2 maila eskatzen zuten lanpostu guztietarako, eta langile horrek ez zuen hizkuntza eskakizun hori betetzen.
Epaileak arrazoia eman dio, eta ebatzi du ez dela legezkoa hautagaia prozesutik kanpo uztea hizkuntza eskakizun hori ez betetzeagatik. Sententziaren arabera, lanpostu guztietarako euskara eskakizuna eskatzea «arrazoituta» egon behar du, eta, kasu honetan, ez da hala; beraz, euskaraz ez jakinagatik ere, hautagaiak «dagokion lanpostua» izateko eskubidea du. Epaia ez da irmoa, eta hamabost eguneko epea dago helegitea jartzeko.
