Urrutikoetxeak 375 eragileren babesa jaso du

PARIS. Datorren astean beste epaiketa bati egin behar dio aurre Josu Urrutikoetxea ETAko kide ohi eta gatazkaren konponbiderako bake negoziazioetan bitartekari lanak egin zituenak, Parisen. Horren harira, nazioarteko 375 aditu eta eragileren babesa jaso du Urrutikoetxeak. Eskatu dute bake negoziatzaileen defentsa egiteko eta Frantziak Josu Urrutikoetxea babesteko. Bakearen Nobel saridunek, pentsalariek, gatazken konponbideetan adituek eta bestek osatzen dute zerrenda. Besteak beste, hauek egin dute bat: Brian Currin abokatuak; Harold Good apaizak; Charlotte Kates Amerikako Abokatuen Elkarte Nazionaleko koordinatzaileak; Monica McWilliams justizia trantsizionaleko adituak; Christiane Taubira Frantziako Gobernuko Justizia ministro ohiak; Carles Puigdemont Kataluniako eurodiputatuak; Slavoj Zizekek eta Noam Chomsky pentsalariek.