Gaur goizean, Baionako suprefeturako langile bat Paueko auzitegiko epailearen aitzinetik pasatu da, ustelkeria afera batekin lotura duelakoan. Urtarril bukaeran auzipetu, eta berehala preso altxatu zuen Frantziako Poliziak. Epaileak azaldu du gutxienez 47 pertsona lotuak egon daitezkeela afera horrekin: hautetsiak, nazioarteko kirolariak, goi funtzionarioak, jendarmeak, baita informazio agenteak ere. Diru edo opari berezien trukean gidabaimenak faltsutu izana leporatzen diote Baionako suprefeturako langileari. Auzipetuaren abokatuak instrukzio denboran aske uzteko eskatu zion epaileari, eta gaur deklaratu du Baionako presondegitik, bideokonferentzia bitartez. Emaitza datorren ostegunean ezagutaraziko du Paueko Auzitegiak.
Oraingoz ez da eman aferarekin lotuak direnen izenen berri. Hala ere, ustelkeria kasua argitara eman zenean, Michel Poueyts Miarritzeko hautetsiaren izena agertu zen zenbait hedabidetan. Gidabaimena goi funtzionarioaren bidez faltsutu izana leporatzen diote Poueytsi. B.O.P.B eta A.B errugbi taldeko jokalari eta jokalari ohiak aferarekin lotuak direla argitaratu zuen Rugbyrama kazetak, baina, Marc Marie prokuradorearen arabera, ustelkeria kasua ez da soilik errugbi munduarekin lotua.
Miarritzeko politikan ezaguna da Michel Poueyts. Zerrenda abertzaleko kide, Didier Borotra auzapezaren axuanta izan zen. 2014ko hauteskundeetan, Biarritz Bestelakoa zerrendaren buru izendatu zuten, eta lehen itzulitik Michel Veunac gaur egungo auzapezarekin batzea erabaki zuten; zerrendari babesa kentzea erabaki zuen orduan EH Baik. 2020ko herri bozetarako, Didier Guillaume Frantziako Laborantza Ministroari erakutsi zion sustengua orain arte —Guillaumeren zerrenda bertan behera gelditu da azkenean—. Sud Ouest egunkariak Jon Bertizberea Poueytsen abokatuaren hitzak bildu zituen. «Pertsona bat baino gehiago auzipetuak dira, baina haren izena da jakinarazi den bakarra. Ez dut ulertzen zergatik tematzen diren haren kontra», esan zuen. Bertibereak segurtatu du instrukzio sekretua urratzeagatik salatuko duela afera.
