Bilboko Atxuri auzoko etxebizitza batzuetako bizilagunak etxetik aterarazi dituzte gaur eguerdian, sute baten ondorioz. Patinete elektriko baten bateria lehertu, eta horren ondorioz sua piztu da etxe batean. Lau pertsona ospitalera eraman dituzte, eta beste hiru han bertan artatu, denak ere kea arnasteagatik, Bilboko Udaleko iturriek jakinarazi dutenez.
Sugarren eraginez kaltetutako etxebizitza George Steer kalean dago, Atxuri auzoan. Udalak esan duenez, patinete elektriko baten bateriak leher egin eta horren ondorioz piztu da sutea. Suhiltzaileak iritsi bitartean, Ertzaintzak etxetik aterarazi ditu sutea piztu den atariko bizilagunak, baita alboko atarietakoak ere. Osasun langileek hiru pertsona han artatu dituzte, eta familia bat —gurasoak eta adin txikiko bi seme-alabak— ospitalera eraman. Bitartean, suhiltzaileek sutea amatatu dute, eta kaltetutako etxebizitza hoztu eta aireztatu gero.
