Kirikiño ikastolako komunitatea eta artista sorta elkartu dira aurtengo Ibilaldiaren kanta ontzeko. Zea Mays taldeko Aiora Renteriak jarri dizkio Hiri Kiribil Bil kantari hitzak, aurtengo leloarekin bat eginda. Hitzak jartzeaz gain, abestu ere egiten du, eta, harekin batera, Ezezez taldeko Unai Madariaga eta Txopet taldeko Jon Fernandez, Andoni Barinaga Rementeria eta Iñigo Guemes aritu dira doinua osatzen eta ahotsa jartzen aurtengo kantari. Ikastolako langileak eta ikasleak ere batu dira haiekin batera abesteko, ahots polifonikoz betetako kanta alaia osatzeko.
Kantak erreferentzia egiten dio Ibilaldia hiri batera eramateari; Bilbora, hain zuzen. Egiten dio erreferentzia transmisioari, iragana, oraina eta geroa lotzeari. Eta euskararen arnasgunea eskatzen du hirian ere, «hau da gure mantra». Euskara erdigunean jartzeko aldarrikatzen du.
Lantalde zabala elkartu da kanta eta bideoklipa ontzeko. Hain zuzen, ikastolaren proiektu komunitarioa indartzen du bideoklipak ere. Imanol Muro ikasle ohiak zuzendu du bideoklipa. Koreografia bat ere sortu dute kantarako. Galako jantzita egin zuten haren aurkezpena Arriaga antzokian. Ibilaldiaren egunean bertan ikusi ahal izango da berriz ere.
Ehunka euskaltzale batu ziren Arriagan kantaren aurkezpenera. Ekitaldiaren ardatz nagusia belaunaldien arteko lotura islatzea izan zen. Ikasleak izan ziren protagonista, eta Hiri kiribil bil kantaz gain, euskal kulturan erreferente diren zenbait kanta abestu zituzten, koreografiaz lagunduta. Baina azpimarratu nahi izan zuten Ibilaldia ez dela egun bateko festa, komunitate oso batek elkarlanean egiten duen urte osoko jaialdi bat baizik. Ekitaldian eskatu zuten euskararen aldeko txinparta bizirik mantentzea denen eginbeharra zela, eta komunitateari eskatu zioten euskararen susperraldian parte aktibo izateko, euskara erabiltzeko eta transmititzeko. Mezu horiek biltzen ditu, hain zuzen, Hiri kiribil bil kantak ere.
HIRI KIRIBILI BIL!
Badator berriz Bilbora Ibilaldia
Oraingoan gurera, komunitatera
Zaharretik berrira, Zuhatzutik Euskal Herrira
Iragana, oraina eta geroa
Hazi, hezi ta bizi, lagunen artean
Nortasuna eraikiz, familia gara
Denok izan dezagun arnasgunea
Hau da gure mantra, hau da gure leloa
Hiri kiribili bil
Bidaia, bidea, bihotza ikastolan
Ta gure harri bitxia beti ahoan
Euskara erdian bihurtu dezagun egia
Hau da gure mantra, hau da gure leloa
Hiri kiribili bil
Kirik Bilbo bildu du Ibilaldia
Hitzen egilea: Aiora Renteria
