2030eko Munduko Futbol Kopa

FIFAk atzera bota du Donostiaren eta Bilboren hautagaitza bateratua 2030eko Munduko Futbol Koparako

Ekainean aurkeztu zuten hautagaitza bateratua Eusko Jaurlaritzak eta Bizkaiko eta Gipuzkoako zenbait erakundek. Gaur Espainiako Futbol Federazioko Louzan presidenteak iradoki du garaia dela Donostiako Udalak eta Eusko Jaurlaritzak erabaki dezaten.

FIFAko zenbait ordezkari Anoeta zelaiaren kanpoaldean, duela bi aste. EFE
FIFAko zenbait ordezkari Anoeta zelaiaren kanpoaldean, duela bi aste. EFE
Maddi Iturriotz Alkorta
2026ko azaroaren 19a
18:46
Entzun 00:00:00 00:00:00

Joan den udan Munduko Futbol Kopa jokatu badute ere, datorren aldia prestatzen ari dira dagoeneko. Jakina da 2030ean Marokon, Portugalen eta Espainian jokatuko dutela Munduko Futbol Kopa, baina egoitzak zehazteko daude. Bada, prozesu horretan, Eusko Jaurlaritzak bere ideia proposatu zuen: Donostiak eta Bilbok hautagaitza bat partekatzea. Espainiako Futbol Federazioko Rafael Louzan presidenteak gaur jakinarazi duenez, FIFAk ez du Eusko Jaurlaritzaren proposamena onartu: «Bi estadio dituen egoitza bakarra egotea eskatu zuten, eta FIFAk ezetz esan du, EAEn bi egoitza daudela, eta, ondorioz, orain haiei dagokiela erabakitzea».

Ekainean iragarri zuten egoitza bateratuaren proposamena Eusko Jaurlaritzak, Bilboko eta Donostiako udalek, Bizkaiko eta Gipuzkoako foru aldundiek eta Athleticek eta Realak. Orduko hartan azaldu zutenez, bi hiriak Munduko Futbol Koparako egoitza izan daitezke, baina ez zuten bideragarri ikusi bi hautagaitza aurkeztea, zenbait arrazoirengatik: kostu ekonomikoa, lehiaketak iraun bitartean hiri horietan beste egitasmorik antolatu ahal ez izatea... Arrazoi horiengatik, aipatutako erakundeek hautagaitza bateratua aurkeztea hobetsi zuten, «FIFAren eskakizun zorrotzak sakon aztertuta, interes orokorra lehenetsita eta herri ikuspegi batetik jarduteko asmoz».

Bada, duela bi aste FIFAko zenbait ordezkari bertaratu ziren Donostiara, Anoeta zelaiari eta Donostia hiriari onespena emateko. Eta gaur bertan, Santiagon (Galizia) egindako agerraldian, Louzanek iradoki du FIFAren erantzuna jaso ostean garaia dela Eusko Jaurlaritzak eta Donostiako alkateak erabaki bat har dezaten.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA