Airearen kutsadura zen atzoko kezka, eta uraren kutsadura da gaurkoa. Gure Gaskuña itsasontziaren suteak eta hura itzaltzeko lanek ke laino handia eragin zuten atzo hainbat orduz Orion (Gipuzkoa). Gaur, sutea itzalita, itsasontziak uretara isuri dituen eta isur ditzakeen erregaia eta bestelako substantzia toxikoak dira kezka. Gure Gaskuña-k gasolioa du oraindik barruan, 70.000-80.000 litro inguru. Itsas Salbamenduak jakinarazi du oraingoz ez dagoela erregairik edo bestelako substantziarik uretan. Ontzijabeari eskatu diote jasotzeko itsasontziaren inguruan dauden hondakinak, eta datozen egunetan plan bat aurkezteko erregaia «modu seguruan biltzeko».
Eusko Jaurlaritzak Itsasertza Planaren alerta fasea ezarri zuen atzo gauean. Itsasertza kutsa dezaketen gertakariei aurre egiteko plana da. Oraingoz, itsasontzia buiekin hesitu dute, erregaia isuriz gero ez zabaltzeko. Eusko Jaurlaritzak zehaztu duenez, Itsasertza Planaren alerta fasea ezartzeak esan nahi du beharrezko baliabideak antolatuko dituztela ibaia eta itsasoa kutsatu direla atzemanez gero. Oria ibaiaren itsasadarrean gertatu zen istripua, Oria ibaiak eta Kantauri itsasoak bat egiten duten lekuan, itsaso aldeko portuan. Gure Gaskuña Ondarroako (Bizkaia) arrasteontziak su hartu zuen, mantentze lanak egiten ari zirela. Hiru pertsona artatu behar izan zituzten kea arnasteagatik, eta horietatik bi Donostia ospitalera eraman zituzten.
Erdi hondoratuta
11:45ean piztu zen sua, baina ez zuten itzali gauera arte. Lurretik eta uretatik aritu ziren sua itzaltzen suhiltzaileak eta itsas salbamenduko ontziak. Itzaltze lanak uste baino gehiago luzatu ziren: goizaldean lortu dute itzaltzea, 04:30ean, ia hamazazpi ordu jardunean aritu eta gero. Lurretik eta uretatik ibili dira sua itzaltzen. Itsasontzia amarratuta zegoen, baina arratsaldean makurtu egin zen. Orain erdi hondoratuta dago, sutearen eta sutea itzaltzeko erabilitako likido guztiaren eraginez. Eusko Jaurlaritzaren arabera, berriz azaleratu beharko dute.
Ipar haizeak kea herrira zabaldu zuen. Eusko Jaurlaritzak leihoak ixteko gomendatu zien Aiako eta Orioko herritarrei. Orioko Udalak zabaldutako oharraren arabera, airearen kutsadura ez zen «larria», baina, badaezpada, itxi egin zuen hondartza ingurua —hondartza ez—. Aire zabaleko eta hondartza eta ibai inguruko jarduerak saihesteko ere gomendatu zuen. Gaur zabalik dago hondartza eremua.
