Aghet

1915ko apirilaren 24ean hasi zuten turkiar gazteak izenaz ezagun bihurtu buruzagi nazionalistek Trebizonda, Alep eta lurraldeko sei eskualdeetan armeniarrek jasan sarraskia. Masakre aurrikusian milioi bat eta erdi pertsonek galdu zuten bizitza. Hamalaueko gerra garai hartan, populu oso baten suntsiketa iragarria isilean gertatu zen. Orduan asmatu ziren genozidio eta humanitatearen aurkako krima konzeptu biak. Alemandar naziek gero turkiarrek mundu mailan lorturiko inpunitatearen hegal pean obratu ahal izan zuten sei milioi judu, tzigana, ezkertiar eta homosexualek pairatu holokausta. Historia izugarria.

Armeniarren genozidioa ez dute onartzen gaurko turkiar buruzagiek. Bertako jendea ordea askotan karrikara jaisten da han edo hemen zerbitzu sekretuek jatorri armeniarreko kazetariak erahiltzen dituztelarik. Turkiaren eta Europaren harremanak likisten ditu Ankarako jaunen kesokeriak. Hargatik bazterrak jabaltzeko duela gutxi lehendakari turkoak bidaia entzutetsua egin zuen Erevan izar daukan Armeniako Errepublikara –euskaldun bezainbat armeniar dago han. Anartean gure artean daude armeniarrak, bihotzetan aghet alias katastrofa deitzen dutena daramatela. Bereziki Miarritzen.