Ez dakit barkamena eskatzea dagokidan, edo auzo lotsa adierazi behar dudan, baina katalandarrek jakin behar duzue euskaldun asko ikaragarri pozten garela asteazkenean Parlamentek hartutako erabakiagatik; mamiagatik, eta bildutako gehiengo kualifikatuarengatik.
Zergatik barkamena eskatu? Eusko Jaurlaritzako kontseilari eta bozeramaile Erkorekak Parlamentek hartutako erabakia baloratzerakoan asteazkenean bertan erakutsitako jokabide hotz, triste, gogatu, indargabe eta ilusiorik gabekoarengatik. Aurreko Jaurlaritza sozialistaren bozeramaile Mendiak horixe esango zukeen egoera horretan.
Ez al dute katalanek animo, indar, bultzada eta zorion mezurik merezi Jaurlaritza abertzale batengandik? Edo gogoratu egin behar al da abertzale katalan eta euskaldunen artean azken mendean, politikan eta kulturan batik bat, egon den harreman solidario eta laguntzailea. Eta nago ni elkartasun azoka horretan defizita daukagula euskaldunok katalanekin. Aukera polita galdu dugu, egunotako terminologia erabilita, defizita murrizteko.
Digestio txarra sortzen die jeltzaleei Kataluniako prozesuak; ez dute hara begiratu nahi, eta are gutxiago goraipatu. Behinola epeltasunaren militante CiU jarrera horretan ikusteak ispiluan begiratzera behartzen ditu. Ulergarria izan liteke, garai honetan, jeltzaleek eta Jaurlaritzak bizkortze ekonomikoan jartzea indarrak eta zentzu guztiak; konpartitu liteke edo ez dedikazio eskusiblo hori. Baina bateragarria izan behar du, alde batetik,ekonomiaren kezkak, eta, beste aldetik, euskaldunongandik horren gertu, geografikoki eta estrategikoki, dagoen Katalunian gertatzen ari denarekiko sentsibilitateak, babesak, atxikimenduak...
Kataluniako prozesua luzea izango da, zuzentzeko denbora badago oraindik.
Enbaxada bila
Digestio onak eta ez horren onak
Iruzkinak
Ez dago iruzkinik
Ordenatu